15:04 «Ազատություն», «Ամոթ», «Սերժիկ, հեռացիր»... | |
«Ազատություն», «Ամոթ», «Սերժիկ, հեռացիր» եւ նման վանկարկումներով Հայ
ազգային կոնգրեսի մի շարք ներկայացուցիչներ, ակտիվիստներ, իրավապաշտպաններ
երեկ կրկին բողոքի ակցիա էին իրականացնում այս անգամ արդեն նախագահական
նստավայրի դիմաց: Մասնակիցները պահանջում էին արդարացնել օրերս Կենտրոն եւ
Նորք-Մարաշ վարչական շրջանների ընդհանուր իրավասության դատարանի կողմից 2-6
տարվա անազատության դատապարտված ՀԱԿ 4 ակտիվիստներին: Դատարանի
որոշումը ակտիվիստները խայտառակություն որակեցին: «Այդ որոշումը
խայտառակություն է, եւ այն սպառնալիք է ՀՀ յուրաքանչյուր ազատ քաղաքացու
համար: Այսօր մենք կանգնում ենք երիտասարդների կողքին եւ պահանջում ենք
արդարացնել Հայ ազգային կոնգրեսի 4 ակտիվիստներին,-հայտարարեց ՀԱԿ անդամ
Զարուհի Հովհաննիսյանը՝ ավելացնելով:- Մեր բողոքի ձայնը չի լռելու, քանի որ
մեզնից յուրաքանչյուրը կարող է հայտնվել նմանատիպ իրավիճակում՝ իր
քաղաքական հայացքների համար»: Նշենք, որ Բաղրամյան պողոտան գրեթե ողջ
երկարությամբ շրջապատված էր ոստիկաններով, սակայն որեւէ բախում նրանց եւ
ակցիայի մասնակիցների միջեւ, բարեբախտաբար, տեղի չունեցավ:
ՀԱԿ-Ը 4 ՏԱՐԵԿԱՆ Է Երեկ լրացավ Հայ ազգային կոնգրեսի ձեւավորման 4-րդ տարին, որն անցավ նախագահականի դիմաց: Ակցիային ներկա ԱԺ ՀԱԿ խմբակցության ղեկավար Լեւոն Զուրաբյանը Կոնգրեսի ձեւավորման 4-րդ տարին պայքարով նշելը խորհրդանշական համարեց: «Մենք պայքարելու ենք մինչեւ վերջ, օգտագործելով Սահմանադրությամբ մեզ տրված բոլոր լծակները՝ այն նպատակով, որ Հայաստանում վերջապես գործի սահմանադրական կարգը: Մենք պայքարելու ենք, որ Հայաստանում ձեւավորվեն ամենակարեւոր ժողովրդավարական ազատությունները»,- հայտարարեց Զուրաբյանը: Նա իր խոսքում, չգիտես ինչու, ներողություն խնդրեց ակցիային ներկա այն մարդկանցից, ովքեր չեն կիսում Կոնգրեսի տեսակետը: Զուրաբյանը թերեւս ակնարկում էր «Սարդարապատ» շարժման նախաձեռնող խմբի անդամ Ժիրայր Սեֆիլյանին եւ Տիգրան Խզմալյանին: «Ես ուզում եմ ողջունել այն քաղաքական ուժերին, այն քաղաքացիական շարժումների ներկայացուցիչներին, որոնք որեւէ կապ Կոնգրեսի հետ չեն ունեցել կամ շատ սուր քննադատության են ենթարկել Կոնգրեսին: Բայց այսօր իրենք մեզ հետ են միայն մի պատճառով. չկիսելով մեր հայացքները՝ նրանք կիսում են մեր անհանգստությունը մեր երիտասարդների համար,- ասաց Զուրաբյանը՝ ընդգծելով, որ իշխանությունները վախենում եւ դողում են իրենցից:- Ամեն գիշեր չեն կարողանում հանգիստ քնեն եւ ճիշտ են անում, որովհետեւ նրանց շատ քիչ է մնացել: Երբ երիտասարդները ոտքի են ելնում, ձեւավորվում է մի սերունդ, մի քաղաքացիական նախաձեռնություն, որը չի հանդուրժի ոչ մի բռնապետություն: Ուրեմն այս բռնապետության օրերը հաշված են»: Ակցիայի մասնակիցները երթով շարժվեցին դեպի Ազատության հրապարակ՝ պատրաստվելով այսօր մասնակցել արդեն ոստիկանության մոտ Վահե Ավետյանի գործը չկոծկելու պահանջով կազմակերպվող ակցիային: | |
|