00:20 Անցանկալի զարգացումներ կլինեն | |
ԲՀԿ նախագահ Գագիկ Ծառուկյանի սանիկ Արթուր
Հարությունյանին (Պալաչ) պատկանող «Քինգ դե լյուքս» ընկերության
ավտոբուսների եւ տաքսիների վարորդների երեկ սկսած անժամկետ գործադուլին
այսօր միանալու են Հրազդան-Երեւան երթուղին սպասարկող վարորդները, ինչպես
նաեւ Հրազդան, Աբովյան քաղաքների ներքին երթուղիները սպասարկող այլ
ընկերությունների վարորդներ: Չի բացառվում, որ առաջիկա օրերին գործադուլին
այլ երթուղիների վարորդներ էլ միանան: Մեր տեղեկություններով, վարորդները
պատրաստվում են վաղը` կառավարության նիստի օրը, փակել Աբովյանից Երեւան
եկող մայրուղին: Մի խոսքով, Պալաչը, կարծես, սպառնում է, իր ընկերությունը
սնանկացման հասցնելու համար, կաթվածահար անել ողջ Կոտայքի մարզի
տրանսպորտային աշխատանքը: Հիշեցնենք, Արթուր Հարությունյանը եւ նրա
ընկերության տնօրենը պնդում են, որ «Քինգ դե լյուքսը», որ մի շարք
երթուղիներ է շահել մրցույթով եւ հսկայական գումարներ է վարկ վերցրել
բանկերից, սնանկացման է հասել Գագիկ Ծառուկյանի բարեգործական ավտոբուսների
պատճառով: Պալաչի մերձավորները պնդում են, որ Ծառուկյանը նպատակաուղղված սնանկացնում է իր սանիկին, որի հետ այժմ ոխերիմ թշնամիներ են: Արձագանքելով վարորդների գործադուլին, երեկ ԱԺ մարդու իրավունքների պաշտպանության հանձնաժողովի ԲՀԿ-ական նախագահ Էլինար Վարդանյանը հայտարարել է. «Կիսակրիմինալ գործարարները, չկարողանալով կառավարել իրենց բիզնեսները, փորձում եմ մեղադրել բարեգործական հիմնադրամին: Այն 40 վարորդները, որոնք ստիպողաբար գործադուլ են անում, որեւէ կապ չունեն գծի տերերի նեղ անձնական շահերի կամ բիզնես ապաշնորհության հետ: Ի դեպ, քիչ առաջ ինձ հետ կապվել են մի քանի տրանսպորտային ընկերությունների ներկայացուցիչներ` «Տիգրան» ՍՊԸ, «ՎԱԳ-Տրանս» ՍՊԸ, «Գալակտիկա» ՍՊԸ, որոնք պատրաստակամություն են հայտնել ավելի լավ պայմաններով աշխատանքի ընդունել նրանց բոլորին: Այնպես որ, վարորդների հարցը փակված է: Խնդիրը պետք է ճիշտ ներկայացնել. մի կողմում վատ գործարար է, մյուս կողմում` հազարավոր ՀՀ քաղաքացիներ, որոնք ամեն օր օգտվում են բարեգործական հիմնադրամի «անվճար երթուղիներ» ծրագրից: Ես խոսել եմ տեղի բնակչության հետ, մարդկանց մոտ տրամադրությունները լարված են, եթե այս խնդիրը շարունակվի արհեստականորեն սրվել, ապա կարող են անցանկալի զարգացումներ լինել»,- մասնավորապես ասված է ԲՀԿ-ական պատգամավորի հայտարարության մեջ: Մենք տեղեկացրել էինք, որ Արթուր Հարությունյանը դիմել է ՀՀ տնտեսական մրցակցության հանձնաժողովին: Հարությունյանը եւ նրա մերձավորները պնդում են` Գագիկ Ծառուկյանը թող անվճար երթուղիներ բացի իր փեսային եւ ԲՀԿ-ական Հարություն Ղարագյոզյանին պատկանող երթուղիների կամ Ռոբերտ Քոչարյանի թիկնապահ Կուկուին պատկանող երթուղիների ուղղությամբ, որոնք եւս սպասարկում են Աբովյան-Երեւան ուղերթերը: | |
|