20:58 Պատասխանող կողմը Ծառուկյանը չէ, այլ՝ Ռոբերտ Քոչարյանը | |
Այս էլ քանի ամիս է՝ քաղաքական դաշտը, լրատվամիջոցները նույն թեման են
արծարծում. Ծառուկյանը նախագահական ընտրությունների ժամանակ կսատարի՞
գործող նախագահ Սերժ Սարգսյանին: Բոլորը տալիս-բռնում, առնում-ծախում են եւ
արդյունքում նույն անորոշությունն է: Վերլուծություններն ու
մեկնաբանություններն ավելի խորհրդավոր են դարձնում Գագիկ Ծառուկյանի
կերպարը, որովհետեւ նրա կողմից որոշակիացվող որեւէ արձագանք չկա:
Իրականում ի՞նչ է կատարվում, փորձենք փաստերի լեզվով տալ գնահատականը: ՀՀԿ
փոխնախագահ Գալուստ Սահակյանը «168 ժամ» թերթին տված հարցազրույցում
անդրադարձել էր 2011թ. փետրվարի 17-ին ՀՀԿ-ի, ԲՀԿ-ի և ՕԵԿ-ի կողմից
ստորագրված կոալիցիոն հուշագրին: Սահակյանն ասել էր, որ «հուշագրի
ստորագրման պայմանավորվածությունների մեջ եղել է նաեւ այն, որ ստորագրող
քաղաքական ուժերից որեւէ մեկը, եթե չցանկանա պաշտպանել այդ հուշագիրը, պետք
է հայտարարությամբ հանդես գա: Առայժմ այդ երեք ուժերից ոչ մեկը նման
հայտարարությամբ հանդես չի եկել»:
Ինչու՞ է լռում Գագիկ Ծառուկյանը. այս հարցն է առաջանում: Ինչու՞ չի որոշակիացնում իր դիրքորոշումը: Թվացյալ լրջության մեջ, հարցն իր մեջ լրջության տարր անգամ չի պարունակում: Այն ունի սովորական պատասխան. Ծառուկյանը չունի որոշակիացված պատասխան, որովհետեւ նա չի պատասխանող կողմը: Պատկերացնու՞մ եք այն մարդու վիճակը, որին դատարանում հարց են ուղղում, մինչդեռ իրավական տեսանկյունից ինքը չի պատասխանող կողմը… Այդ հարցը պետք է ուղղել պատասխանող կողմին՝ ասենք Երկրորդ նախագահին. «Հարգելի Ռոբերտ Քոչարյան, ե՞րբ են ավարտվելու ձեր քաղաքական բանակցությունները, որպեսզի տեղակայեք ձեր կրակակետերը ու ըստ այդմ որոշեք՝ ուժներդ բավականացնու՞մ է գործող նախագահին մի քայլ ետ թողնելու համար (մի քայլ եմ ասում, որովհետեւ քաղաքական տեսակետից Ռոբերտ Քոչարյանը Սերժ Սարգսյանին դուրս չի մղի): Գուցե ճիշտ եք անում, որ որոշել եք ձվերը աշնանը հաշվել, բայց հավատացնում եմ՝ Հայաստանում էլ ձու ածող հավ չեք թողել, բոլորը ձեզնից հետո ձվից կտրվել են: Ուստի խնդրում ենք՝ օր առաջ ժողովրդին տեղեկացնել, թե Գագիկ Ծառուկյանն ի՞նչ է անելու…» Հավատացած եղեք, որ Ռոբերտ Քոչարյանը կպահանջի, որ մյուս պատասխանող կողմին՝ գործող նախագահին էլ հարցնել: Հասմիկ ԲԱԲԱՋԱՆՅԱՆ | |
|