12:17 Պետրոս Ղազարյան. Անիմաստ PR-շիկների կյանքից | |
Հեռուստամեկնաբար Պետրոս Ղազարյանը E էլեկտրոնային պարբերականի (ejournal.am) իր բլոգում գրում է. Նախընտրական քարոզարշավն արդեն կիսվել է և այս ընթացքում հրապարակվել է ութ սոցիոլոգիական հետազոտություն: Ամբողջ հմայքն այն է, որ ութից որևէ մեկը նման չէ մյուսին, ինչը ապացուցում է դրանց հակագիտական լինելը: Շատ խորաթափանց վերլուծաբանների կարծիքով այս հարցումների միջոցով մեզ մեսիջներ են ուղարկում Արևմուտքը և Ռուսաստանը, պարզապես խորաթափանցների կարծիքով այդ մեսիջները գալիս են նախագահականից, Բարգավաճից և ՕԵԿ-ից: Նույնիսկ երկար մտածելուց հետո ես չեմ կարողանում հասկանալ, թե այդ թանկարժեք մեսիջներն ում են ուղղված: Տարբեր ցուցակներում ծվարած և քարոզարշավի այս ընթացքում այդպես էլ ծպտուն չհանած քաղաքական գործիչները հավատում են միայն իրենց առաջնորդին, մամուլը՝ իր պատվիրատուին, սովորական քաղաքացին այդ թվերի հետ իր կապը տեսնում է այնքան, որքան ընտրություններից հետո հրապարակվող թվերի հետ: Ես չգիտեմ` ով է շահում այս հարցումներից, բայց գիտեմ` ով է տուժում՝ ԱհարոնԱդիբեկյանը. նա այլևս թվեր նկարելու մենաշնորհ չունի: Հ.Գ. Ես ներկայացնում եմ իմ սեփական հարցումը, որին մասնակցել է մեկ միլիոն մարդ, այն մասին, թե որ հարցման արդյունքներին են հավատում մեր քաղաքացիները. • Այն հարցմանը, որից առաջ 10000 դրամ են բաժանել – 35 % • Այն հարցմանը, որից առաջ սպառնացել են գործից հեռացնել - 30 % • Ոչ մի հարցման չեմ հավատում - 28 % • Գելափի հարցմանը – 4 % • Ադիբեկյանին - 2 % • Գևորգ Պողոսյանին – 1 % | |
|