10:44 Վարչապետը պաշտպանվո՞ւմ է Քոչարյանից | |
Ռուսական Կոմերսանտ պարբերականին վարչապետ Տիգրան Սարգսյանի տված հարցազրույցում բավական ուշագրավ մի դրվագ կա, որտեղ լրագրողը նրան հարցնում է Պուտինի եւ Սանկտ-Պետերբուրգի ասոցիացիայի մասին, հիշեցնելով, որ Տիգրան Սարգսյանն էլ սովորել է Սանկտ-Պետերբուրգում: "Հպարտ եմ, որ յոթ տարի սովորել եմ Պետերբուրգում, որն իմ երկրորդ հարազատ քաղաքն է: Այնտեղ շատ բարեկամներ ունեմ: Նրանցից շատերն այսօր լրջորեն առաջ են գնացել: Նրանք զբաղվում են քաղաքականությամբ, բարձր պաշտոններ են զբաղեցնում: Սա վկայում է, որ մեր պիտերյան տնտեսագիտական դպրոցը շատ ուժեղ է”, պատասխանում է Տիգրան Սարգսյանը: Այդ պատասխանի մեջ թերեւս բավական հստակորեն նշմարվում է Հայաստանի իշխանական դաշտին ուղղված մի նուրբ ակնարկ: Տիգրան Սարգսյանը փաստացի ակնարկում է այսպես ասած "սանկտ-պտերբուրգյան կլանի” մաս լինելու մասին, որը ներկայում իշխանություն է ՌԴ-ում: Վարչապետն ըստ ամենայնի փորձում է Հայաստանի իշխանության մեջ հավաքված տարբեր խմբերի ցույց տալ, թե ովքեր են իր թիկունքում եւ որքան ուժեղ է ինքը, որպես "սանկտ-պետերբուրգյան տնտեսագիտական դպրոցի” ներկայացուցիչ: Տիգրան Սարգսյանը թերեւս լավ գիտե, թե Պուտինի անունն ինչ ազդեցություն ունի Հայաստանի իշխող համակարգում, ու լավ է պատկերացնում, թե ասոցացվելով այդ անվան հետ, ինչպիսի մեծ ազդեցություն է հնարավոր ձեռք բերել իշխանության համակարգում, առնվազն հոգեբանական իմաստով:
| |
|